coleg-meirion-dwyfor

Adeilad addysgol newydd a gwaith cysylltiedig ar gampws Coleg Meirion Dwyfor, Dolgellau

Mae Cadnant Planning Ltd wedi cael eu comisiynu gan Grŵp Llandrillo-Menai i gynnal ymgynghoriad cyn ymgeisio am gais Cynllunio (PAC) mewn perthynas â'r datblygiad arfaethedig yng Ngholeg Meirion Dwyfor, Dolgellau.

Rydym yn rhoi rhybudd bod Grŵp Llandrillo-Menai yn bwriadu gwneud cais am ganiatâd cynllunio llawn ar gyfer codi adeilad addysgol newydd, gosod trac mynediad newydd, codi strwythurau PV o fewn maes parcio presennol ynghyd â gwaith cysylltiedig gan gynnwys tirlunio a draenio.

Cyn ei gyflwyno'n ffurfiol i'r Awdurdod Cynllunio Lleol ac yn unol â'r gofynion a nodir yn Rhan 1A o Orchymyn Cynllunio Gwlad a Thref (Gweithdrefn Rheoli Datblygu) (Cymru) (Diwygiedig) 2016, bydd y cynnig yn destun ymgynghoriad cyn ymgeisio.

YNGLYN A'R CAIS

Mae'r cais hwn yn ymwneud â chynnig gan Grŵp Llandrillo-Menai i wella eu cyfleusterau addysgol ar gampws Coleg Meirion Dwyfor yn Nolgellau.

Coleg Meirion Dwyfor yw’r unig ddarparwr Addysg Bellach yn rhanbarth Meirionnydd, gan ddarparu ar gyfer ardal ddaearyddol eang ond tenau ei phoblogaeth fel rhan o drefniadau addysg drydyddol ym Meirionnydd. Mae gan y coleg bum ysgol fwydo heb chweched dosbarth ac mae hefyd yn denu dysgwyr o bellach i ffwrdd o ogledd-orllewin Gwynedd i ymgymryd â darpariaeth arbenigol nad yw ar gael ar gampws Pwllheli.

Byddai'r adeilad addysgol newydd arfaethedig yn rhan o gynllun ailddatblygu graddol ar gyfer campws Dolgellau, i ddarparu canolfan Lefel-A newydd yn darparu mannau addysgu modern, amlbwrpas. Ar hyn o bryd, mae llawer o'r ddarpariaeth bresennol wedi'i lleoli o fewn estyniad 1889 i'r ysgoldy a oedd yn bodoli eisoes. Mae’r cynnig yn cynrychioli buddsoddiad o £10M i greu cyfleuster addysg Lefel-A deniadol, sy’n addas i bwrpas.