Nod y prosiect yw sefydlu grŵp teuluol o afancod fel rhan o dreial afancod caeedig 5 mlynedd yng Ngwarchodfa Natur Green Gates a monitro eu heffaith ar y gwahanol rywogaethau a chynefinoedd sy'n cael eu creu ac yn datblygu ar y warchodfa natur ar hyn o bryd. Nod y prosiect hefyd yw darparu astudiaeth achos leol gyda ffocws cryf ar addysg, gan ganiatáu i bobl ddysgu am afancod a gweld eu heffaith yn uniongyrchol..

​

Bydd yr afancod yn cael eu cartrefu mewn safle caeedig diogel, ac felly, bydd Cyngor Sir Ddinbych yn gyfrifol am gynnal eu lles. Bydd hyn yn amod ar gyfer unrhyw drwydded a roddir gan CNC.

​

Bydd y safle caeedig oddeutu 24 erw o arwynebedd, wedi'i adeiladu gyda ffensys, gan gynnwys mesurau a roddwyd ar waith i atal cloddio ac i atal dringo. Bydd ceuffosydd yn cael eu defnyddio o fewn y safle gyda nodweddion dylunio i atal dianc, ond yn caniatáu i fywyd gwyllt arall fynd i fyny ac i lawr yr afon. Ceir rhagor o fanylion yn y dogfennau ymgynghori isod. Fel rhan o'r drwydded, bydd Cyngor Sir Ddinbych yn cynnal gwiriadau ffens rheolaidd i sicrhau ei bod yn parhau i fod yn ddiogel drwy gydol y treial.

​

Mae afancod yn rhywogaeth allweddol y dangoswyd eu bod yn newid eu hamgylchedd ac yn cynyddu bioamrywiaeth. Nod cyffredinol y prosiect yw y bydd yr afancod hyn yn cynyddu'n sylweddol y digonedd a'r amrywiaeth o fywyd gwyllt yn y warchodfa natur.

 

Rhagwelir y bydd Cyngor Sir Ddinbych yn gallu symud yr afancod i'r safle caeedig yng Ngwanwyn neu Haf 2026. Mae'r dyddiad terfynol yn dibynnu ar y cyfnod penderfynu ar gyfer y cais am drwydded, a pha mor gyflym y mae'r cynefinoedd gwlyptir ar y safle yn sefydlu.

​​​

​Cynhelir digwyddiad ymgynghori cyhoeddus ar 24 Medi ym Mhlanhigfa Goed Sir Ddinbych, Gwarchodfa Natur Green Gates,
Llanelwy, LL17 0LF rhwng 3.00y.p. a 7.00y.h. Rydym yn croesawu aelodau o'r gymuned leol i ddod draw i drafod y cynlluniau gydag aelodau o dîm y prosiect. Mae cyfarwyddiadau i'r lleoliad ar gael yma.

​