Mae’r datblygiad hwn yn cael ei gynnig gan Adra (Tai) Cyf, sy’n ceisio caniatâd cynllunio llawn ar gyfer codi 13 o dai preswyl ynghyd â gwaith cysylltiedig, gan gynnwys creu pwynt mynediad newydd i’r safle. Byddai’r datblygiad hefyd yn cynnwys gwaith cysylltiedig ar gyfer ffordd fynediad fewnol a mannau parcio, tirlunio a mannau amwynder cyhoeddus, yn ogystal â darpariaethau draenio, gan gynnwys systemau draenio cynaliadwy.

 

Mae’r cynllun yn darparu 100% o dai fforddiadwy a byddai’n cynnwys 13 o fyngalos, gyda’r nod o ddiwallu angen tai penodol ar gyfer pobl leol. Y bwriad yw rhoi blaenoriaeth i’r unedau a gynigir i ymgeiswyr dros 55 oed. Fodd bynnag, os na ellir gosod pob uned yn uniongyrchol i ymgeiswyr o’r oedran hwn, bydd ymgeiswyr iau na 55 oed sydd angen uned hygyrch hefyd yn cael eu hystyried.

 

Mae’r holl dai arfaethedig yn cynnwys byngalos dwy ystafell wely. Bydd pob uned yn hunangynhwysol, gyda dwy ystafell wely, cegin/ardal fwyta, ystafell fyw ac ystafell ymolchi. Bydd y cynllun yn cynnwys cyfanswm o 21 o fannau parcio ar y safle, gyda 8 ohonynt ar gyfer ymwelwyr, a bydd ardal ardd amwynder yn cael ei darparu naill ai o flaen a/neu y tu ôl i bob uned.

 

Bydd mynediad i gerbydau i’r safle yn cael ei ddarparu drwy ymestyn y ffordd fynediad bresennol sy’n gwasanaethu adeilad presennol Morfa Cadfan i’r gorllewin. Bydd llwybrau newydd yn cael eu darparu ar y safle, ynghyd â thirlunio meddal ar ffurf plannu coed a gwrychoedd.

 

Mae’r cynllun arfaethedig yn cynnwys darpariaeth gysylltiedig i gogledd-orllewin y safle ar gyfer darparu basn gwanhau, a fydd yn rhan o’r strategaeth ddraenio gynaliadwy ar gyfer y datblygiad. Bydd man amwynder anffurfiol yn cael ei ddarparu yng nghornel de-orllewinol y safle, ynghyd â phlannu meddal i’w wneud mewn rhannau o’r safle. Mae’r cynnig hefyd yn darparu coridor draenio dŵr wyneb i’r gogledd o’r safle, a fydd yn darparu cysylltiad ar gyfer gollwng dŵr wyneb i’r cwrs dŵr.