Mae’r ymgynghoriad yn ymwneud â chais cynllunio drafft ar gyfer ailddatblygu’r lagwn syrffio presennol yn Adventure Parc Snowdonia, ynghyd â gweithrediadau peirianyddol i fewnlenwi rhan o’r lagwn, lleoli 21 caban gwyliau, a newidiadau ac estyniadau arfaethedig i adeilad presennol Adrenaline Indoors er mwyn gwneud lle i atyniad hamdden newydd ar ffurf 'Snowtunnel’.

Mae safle’r cais yn rhan o safle Adventure Parc Snowdonia, a elwid gynt yn Surf Snowdonia, a agorodd yn 2015 fel atyniad nodedig i greu gweithgaredd o bwys a fyddai’n denu marchnad newydd i Ogledd Cymru.

Nid oedd datblygiad y safle gan y teulu Ainscough yn 2015 heb ei heriau. Ochr yn ochr ag arloesi gyda’r dechnoleg syrffio mewndirol newydd nad oedd erioed wedi’i darparu’n fasnachol o’r blaen yn y byd, roedd angen lefel sylweddol o fuddsoddiad ar y safle. Fodd bynnag, roedd y teulu wedi ymrwymo i'r prosiect yn y tymor hir i roi dyfodol i'r safle.

Yn anffodus, arweiniodd methiannau mecanyddol rheolaidd y dechnoleg syrffio a osodwyd yn Surf Snowdonia at wyth tymor simsan (ond eto’n llwyddiannus mewn sawl ffordd arall) a bu’n rhaid i’r busnes wneud y penderfyniad anodd i gau’r lagwn syrffio yng nghanol 2023. Bellach mae gan y safle gyfle i gartrefu atyniad arall o safon fyd-eang gan ddefnyddio technoleg syrffio newydd.

Mae Adventure Parc Snowdonia Ltd wedi bod yn gweithio’n agos gyda’r ymgeisydd, Global Shred Ventures Ltd i ddatblygu cynnig a fyddai’n ailddatblygu rhannau o safle Adventure Parc Snowdonia i ddod â’r lagwn syrffio presennol yn ôl i ddefnydd trwy gyflwyno technoleg cynhyrchu tonnau newydd (technoleg syrffio Wavegarden 'The Cove') sydd bellach wedi'i phrofi i greu profiad syrffio newydd ar y safle. Byddai rhan o'r lagwn syrffio presennol yn cael ei lenwi i greu llwyfandir newydd ar gyfer datblygiad cabanau gwyliau newydd, ynghyd â man traeth i ymwelwyr ei fwynhau.

Ochr yn ochr â hyn, cynigir newidiadau, adnewyddu ac estyniadau i’r adeilad Adrenaline Indoors presennol ar y safle, er mwyn darparu ar gyfer atyniad hamdden a thwristiaeth dan do newydd, a elwir yn ‘Snowtunnel’.

Byddai atyniad Snowtunnel yn rhoi cyfle i eirafyrddwyr, sgiwyr a phobl sy'n hoff o chwaraeon eira gymryd rhan yn eu chwaraeon trwy gydol y flwyddyn, unrhyw bryd, mewn unrhyw dywydd, yn agos at eu cartrefi. Mae'n dod â'r hyn y mae pyllau tonnau a thwneli gwynt wedi'i gyflwyno i'r diwydiant syrffio ac awyrblymio.

Mae'r cynnig yn cynrychioli buddsoddiad o £21 miliwn, a fyddai'n cynnig 75 o swyddi cyfwerth ag amser llawn newydd, a byddai disgwyl i 20 ohonynt fod yn swyddi amser llawn.