Mae'r datblygiad arfaethedig yn ymwneud â chais cynllunio llawn ar gyfer codi 10 annedd fforddiadwy, ynghyd â gwaith cysylltiedig ar gyfer gosod ffordd fynediad fewnol newydd sy'n ymestyn o Heol Martin, darparu bylchau parcio ychwanegol i wasanaethu'r anheddau presennol ar Stryd Fawr Eglwysbach, ardaloedd wedi'u tirlunio a darpariaethau draenio.

Dyrennir y safle ar gyfer datblygiad preswyl o hyd at 10 tŷ annedd o dan Bolisi HOU/1 Cynllun Datblygu Lleol Conwy (CDLl) ac mae'r datblygiad yn cynnig codi 10 annedd fforddiadwy. Mae polisi cynllunio lleol yn nodi y dylai datblygiadau preswyl ar safleoedd a ddyrannwyd o fewn 'Prif Bentrefi' Haen 2, fel Eglwysbach, geisio sicrhau 100% o’r angen am dai fforddiadwy lleol (AHLN) o dan Bolisi HOU/2 y CDLl.

​

Bydd yr holl dai yn cael eu darparu fel tai fforddiadwy a fydd ar gyfer pobl leol drwy gofrestrau tai fforddiadwy lleol fel Tai Teg. Mae trafodaethau'n parhau gyda Landlordiaid Cymdeithasol Cofrestredig lleol er mwyn sicrhau bod y tai hyn yn cael eu darparu fel anheddau fforddiadwy i drigolion lleol, a disgwylir y bydd LCC yn cyd-weithio â'r prosiect hwn yn y dyfodol agos.

Bydd y datblygiad yn ymestyn ffordd ystâd Heol Martin i'r de-ddwyrain, gyda ffordd newydd yn ymestyn i ffwrdd i wasanaethu'r anheddau arfaethedig a chyrraedd cefn gerddi'r anheddau ar y stryd fawr, lle nodir bod chwe lle parcio ychwanegol yn cael eu darparu i leddfu'r problemau parcio a wynebir ar hyd y Stryd Fawr. Bydd yr holl anheddau arfaethedig wedi'u lleoli y tu allan i'r parth perygl llifogydd ac i ffwrdd o'r cwrs dŵr sydd i'r de o'r safle. Mae'r datblygiad wedi'i gynllunio i gadw cymaint o'r llystyfiant a'r coed presennol yn y safle a'r cyffiniau ac mae'r anheddau wedi'u cynllunio i fod o ansawdd uchel o ran ymddangosiad a deunyddiau, gyda chyd-destun yr ardal gyfagos yn cael ei gadw mewn cof.

​

Mae rhagor o fanylion ar gael o fewn y dogfennau cais cynllunio drafft sydd wedi'u cynnwys yn y pecyn ymgynghori cyn ymgeisio hwn.

​