Mae'r ymgynghoriad hwn yn ymwneud â chais cynllunio drafft gan Gyngor Sir Ynys Môn i ddatblygu cynllun o 40 o dai fforddiadwy ar dir ger Maes Mona, Amlwch.

Cyngor Sir Ynys Môn sy'n berchen safle'r cais ac mae wedi'i ddyrannu yng Nghynllun Datblygu Lleol ar y Cyd Gwynedd a Môn ar gyfer datblygiad preswyl o hyd at 50 o dai. 

Byddai’r tai fforddiadwy arfaethedig yn cynnwys y cymysgedd fel a ganlyn:

• 10 x fflat un llofft;

• 3 x byngalo un llofft;

• 3 x byngalo dwy ystafell wely;

• 12 x tŷ dwy lofft;

• 8 x tŷ tair llofft; a

• 4 x ty pedair llofft.

Byddai'r ddau ddarn o dir sy'n ffurfio safle'r cais yn cael eu datblygu fel dau gam, gyda'r tir i'r gorllewin yn ffurfio rhan 1 a'r parsel dwyreiniol yn ffurfio rhan 2. Byddai Cam 1 yn cynnwys 19 o dai (plotiau 1-19) a 21 o dai (plotiau 20-40) yng Ngham 2.   

Byddai gan bob tŷ le parcio i'r blaen/ochr gyda rhan fechan o ardd flaen/ochr gyda'r brif ardd yn y cefn. Byddai man patio a sied ardd yn cael eu darparu o fewn pob llain.

Byddai dau bwynt mynediad i gerbydau yn cael eu darparu o Faes Mona; un yn parhau gyda'r ffordd fynediad tua'r gogledd rhwng rhifau 46 a 47 Maes Mona a'r llall yn dilyn y ffordd fynediad i'r dwyrain, rhwng rhifau 29 a 50 Maes Mona.

Mae ardaloedd presennol creigiog ar y tir o fewn y llain ddwyreiniol, a chynigir darparu ardal o fannau agored cyhoeddus o fewn yr ardal hon, gyda chysylltiadau i gerddwyr o fewn yr ardal. Byddai cysylltiad i gerddwyr rhwng cam 1 a cham 2, yn ogystal a chysylltu llybrau cerdded tuag at yr A5025 (Ffordd Porth Llechog) i'r gogledd. Cynigir pocedi anffurfiol o fannau agored o fewn y safle ehangach, lle cynigir coed a thirlunio meddal.

​